Pardehshilife

कोरियाबाट नेपालीले के सिक्ने ?

 खेम कार्की दक्षिण कोरिया विश्वमै छोटो समयमा आर्थिक छलाङ मार्ने राष्ट्र हो । दक्षिण कोरिया एसियामा मात्र नभइ विश्वव्यापी रुपमा नै आर्थिक दृष्टिकोणले शक्तिशाली राष्ट्रको रुपमा आफुलाई उभ्याउन सफल भएको छ । कोरियामा बहुसाँस्कृतिक वातावरणको निमार्ण भइरहको छ । विश्वव्यापीकरणको अहिलेको अवस्थामा हामीले कोरियाबाट धेरै कुरा सिक्न जरुरी छ । अहिले करिब४०   हजारको हाराहारीमा नेपालीहरु कोरियामा छन् । कोरियामा रहेका नेपालीले कम्तिमा बेसिक तलब १ लाख ५० हजार बेसिक कमाउछन ।  मासिक २ देखि ३ लाख बढी कमाउने पनि नेपालीहरु छन् । यसको आधारमा कोरियामा भएको नेपालीले गुणात्मक रुपले आकर्षक आम्दानी गर्दछन् ।

आम्दानी गर्नुमात्र ठुलो कुरा होइन हामीले त्यो रकमलाई रेमिट्यान्सको रुपमा भित्र्याएपछि उत्पादनमुलक काममा कसरी प्रयोग गर्न सकिन्छ भन्ने मुख्य कुरा हो । कोरियाले छोटो समयमा गरेको तिब्र विकासबाट हामीले धेरै कुरा बुझ्नुपर्दछ । चाहेको खण्डमा छोटो समयमा विकासको काम गर्न सकिन्छ भन्ने उदाहरण सिक्न सकिन्छ । कोरियाले गरेको आर्थिक विकास नेपाल र नेपालीको लागि एउटा पाठ हुन सक्छ । जसरी कोरियाले सुरुमा साना तथा मझौला कम्पनीको स्थापनाबाट सुरु गरेर आज विश्वका ठुलठुला कम्पनी एलजी, सामसुङ, हुन्डाइ जस्ता स्थापित कम्पनीका ब्राण्डहरु निमार्ण गर्न सफल भएको छ । कोरियासँगको सहकार्यमा यस्ता औधोगिक क्षेत्रको विकास गर्न नेपाल सरकारबाट अझ पहल गर्न जरुरी छ ।

यसैगरी कोरियामा रहेका नेपालीले कोरियाबाट फर्केर यहाँ सिकेका सीप, ज्ञान र क्षमताको प्रयोग गरी देश विकासमा योगदान गर्न सकिन्छ । हामीले कोरियाको समाज, यहाँको राजनीति यहाँको मानिसहरुबाट पनि सकरात्मक कुराहरु सिक्न सक्छौं । कोरियनहरुले आफ्नो देशप्रति गर्ने माया, कामको सम्मान, निरन्तरको परिश्रमले आज कोरिया यति अघि बढ्न सफल भएको छ । कोरियाले सुरुको विकास चरणमा आफ्ना जनताबाट सुनचाँदी नगद जस्ता सम्पत्ति संकलन गरेर आफ्नो देश विकासमा लगाउन सफल भयो । सेमाअल अन्हेङ जस्ता यहाँको गाउँ विकास गर्ने अभियानबाट हामीले आफ्नो गाउँ आफैं बनाउन सिक्नुपर्छ । यहाँको राजनैतिक, सामाजिक र कानुनी वातावरणले पनि देश विकासमा सहज वातावरण सृजना गरेको छ ।

हामीले ठुला कुरा मात्र गर्न जरुरी छैन । हामीसँग भएका आम्दानीलाई कृषि, पशुपालन, घरेलु व्यवसाय, साना तथा मझौला उद्योग खोलेर काम गर्न सक्छौं । कोरियामा रहेका नेपालीहरुले आपात विपतको बेलामा मुलुक र जनता अनि देशको विभिन्न ठाउँमा सामाजिक र परोपकारी काम गरिरहेका पनि छन् । तर यो बेला हामीले कृषि सहकारी, उद्योग, व्यवसाय तथा जलविधुत जस्ता ठुला क्षेत्रमा लगानी गर्ने वातावरणको खोजी गर्न जरुरी छ ।

हामीले संयुक्त लगानीको अवधारणाको विकास गरी कोरियामा इपिएस तथा मजदूरको रुपमा कार्यरत नेपाली, विद्यार्थी, व्यापारीलगायत सम्पूर्ण नेपालीहरुले सामाजिक पछि आर्थिक अभियानका रुपमा नमुना काम गरेर देखाउनुपर्छ । सरकारले पनि रेमिट हाइड्रोजस्ता जलविधुतको क्षेत्रमा काम गर्ने योजना ल्याएको छ । सरकारले कोरियासँगै प्रवासका नेपालीको रेमिट्यान्सको आम्दानीलाई सदुपयोग गर्न अब ठोस कदम चाल्न जरुरी छ । कोरियामा कमाएको आम्दानीबाट नेपालमा घर र घडेरी मात्र नभइ उतपादनमुलक क्षेत्र, कृषि, पशुपालन, उद्योगका साथै पर्यटन, स्वास्थ्य, शिक्षा, शेयर, सहकारी जस्तामा लगानी गर्नु राम्रो हो ।

(लेखक नेपाल पत्रकार महासंघ दक्षिण कोरियाका प्रमुख सल्लाहकार तथा केन्द्रीय पार्षद हुन । )

सम्बन्धित समाचार

लोड हुदै....